ZORAM THAR

-         Rorelliana

-         9612207107

 

TUNA ZORAM DINHMUN : Tuna kan Zoram dinhmunah hi chuan tum ah kan lungawi lo a ni.

Zohnam-in kan luah chin ram hi kan ram Chungkhuanu min dahna a ni a, eng emaw zat kan ram leilung leh a mihring cheng Zohnam te chu Myanmar-in a awpbet tela, eng emaw zat Bangladesh-in min awpbet a, eng emaw zat India-in min awpbet tel bawk a ni.

Tu nge pianpuite duh vang ni hauh loa bang dana dah tlata lungawi awm thei ang? Kan ram leh hnam thil engpawh rorelho theihna kan nei lo a, duh hun hunah kan inkalpawh thei bawk hek lo. Tunah phei chuan unau chhul khat chhuak kan ni tih pawh kan hai zo tawh a, pianpuite ngei pawh “ramdang mi(foreigner)”kan inti nelh nelh mai zawng a nih tak hial hi!

Chu mai a ni lo a, thil neihkan inruk sak mum mum a, kan insawichhe tawn bawih bawib a, hnam khat lungrualna nei reng reng loah kan awm mek a nih hi.

Sakhuana lamah lah Kristianna hnuaiah pawl hrang tam takah kan inphel darha , mahni hnampui ngei nupui pasala inneih tawn theihlohna dan te kan nei veng vung hlawm a. “Kan kohhran a nih loh chuan kan nei thei lo,”te kan ti nelh nelh hlawm a nih tak hi. Khawkhat chauh pawh pawl hrang hrangah kan inphel darh a, chu mai ni loin chhungkua pawh pawl hranga inphel darh an awm phung mai bawk nen. Zoram leh hnam chu rind an hlir awmkhawm lungrual reng reng lo kan ni ta.

Kohhran thusawitu(sermon) reng reng lahin, kan ram leh hnam changthlan awm reng reng lo. Israel ram leh an khua leh tui, an hnam chanchin an changthlan a; kan inhrilh vak vak a, Israel ram leh an Pathian hmuh dan sawi thiam apiang kha Pathian thu sawi thiama kan neihte an ni.

Kohhran mipuiteah harhna nasa pui puite a lo thleng thin. El Bethel harhnaahte mi a sing telin Mualpui lam an pan ruih ruih a, rinna thlai chi-ahte chuan rangkachak thi te, zungbun te, a tla tawp tawp mai bawk nen, an tawngtai thum vut vut a, a ropui nangiang mai. Thlarau thianghlim Baptist harhna, namthluk runpui te a lo thleng leh a, an innam thlu leh ruih ruihmai a, sorkar roreltute pawh an bang chuang lo.

Heng harhna “Pathian thlarau hnathawh”kan tih te hian kan ramah hmuh theih khawpa rah tha a chhuah awm reng reng a alang lo. Sualna a san gtial tialin a lang zawk a, inthahna, eirukna leh jail bang zuttu an tlem phah chuang lo. Sualna a sosan leh “Bible a thleng dik”an ti then mai.

Tunah Kelkang harhna runpui a lo thleng leh ta a, mipuiin an bawh ruih ruih mai a, a nuaih tel tak meuhin an pan ruih ruih mai tih kan hria. Pathian hnathawh a nih ngat chuan ram hmel a her danglam ngei ngei dawn a, an nunah Pathian zia a lo lang ang a, kan ram chuan a nawm phah hle tura ngaih a ni.

Ram leh hnam nunah thatna lam kawnga danglamna a awm chuan loh chuan, lam mup mupna leh kal ruih ruihna leh tawngtai vak vaka a tawp leh mai a, mahni tanghma hai dan ngai renga kan tlan leh sung sung tho a nih chuan Pathian thlarau harhna ni loin Kristian kohhran harhna mai a nil eh dawn a ni.

Heti taka mipuiin an bawh ruih ruihna chhan pawh hi Pathian Thlarau hnathawh ni ngeiah an ngai a, Zoram thar thlenna tur bul tannaah an ngai hial a ni.

Tuna kan ram dinhmunah hi chuan ei leh barah kan intodelh lo em em a, thalai rualte lah an thatchhe hlawm hle si. India sorkarah kut kan dawh tluk tluk mai a, Zoram sorkarna chelhtute lah chuan sum harsat thu an sawi chamchi a, sum a harsat the lul nen, roreltute lah chu cher kawk kawk awm an nih lain an thau mumkung kung zel lawi a, car changkang ber berah an tlan zer zer thei nia!

Ram  mipuite erawh mautuai khawrh, meihawl rawh leh mi hausa hnuaia inhlawhfain ei an zawng mek a. Sorkarin NLUP sum tlemte te a sem chu nghakhlel takin mitt la dawnin an dawn hun tur an thlir a, ram mipuite chu lungngaiin kan rum tak meuh a ni.

Tunah chuan Zoram hi Kristian-a kan tawlh luhna kum 121 lai a lo ni ta a, kum za(100) chuang lai Kristian sakhua leh Kristianna hnuaiah ram rorel a lo ni ta a. A lan dan hi chuan Kristianna hi chuan ZORAM THAR chu min thlen dawn lo tih chu a chiang hle mai. Kum za dang pawh kal chho leh ma hila, ram leh hnam chuan a that belh a rinawm chuang lo a ni.

ZORAM THAR LO LAN DAN TUR:

1.      Zoram tharah chuan Zofate luah chin hi then darhin a awm tawh lo ang a, lungrual takin rorelna pakhat hnuaiah kan awm tawh dawn a ni.
  
2.      Kan ram Zoram, Zofate luah chin ram hi Pathian Khuanu min pek; a daha min dahna a ni. Kan ram a ni a, kan thutchilh Pathian thu a ni tih Zofaten kan hre vek taw hang. Mitinin kan Pathian thu a ni tih hriain kan ram zahawmna kan hmu ang a, ram pawi khawih chu Pathian Khuanu pawi khawihna a ni tih leh ram thatna tura thawktu chu Pathian tana thawk  kan ni tih kan inhre vek taw hang.  

3.      Zoram tharah chuan kan ram a sorkar hna thawk zawng  zawng hian an hna thawh theuh chu Pathian Khuanu rawngbawlna ani tih an hriat vek tawh dawn avangin mi tin an hna thawhah an rinawm em em vek tawh dawn a. Zoram tharah chuan nihna inchuh buai thawm reng reng hriat a ni tawh dawn lo a, mak tih khawpa nihna inken thawm rite chuan Zoram a fang kual zel tawh dawn a ni. 

4.      Zoram tharah chuan intanpui tawnnate chu Zohnam nun zepui a ni tih hriain, intanpui tawn turin hnam chu a tlan sung sung tawh dawn a ni. 
5.      Eirukna thawm ri hriat tur a awm tawh dawn lo a, eiruk duh miah lohnain Pathian Khuanu chu kan be taw hang. 

6.      Zoram tharah chuan Zohnam kuangkuah tlattu, kan hnam rohlu tlawmngaihna hi Pathian Khuanu thuthlung Zohnam-a phum tlat a ni tih kan hre vek tawh ang. Tlawmngaihna chu tumahin khawvel thilah an dah ngai tawh lo an.

 7.      Zoram tharah chuan kan ram roreltu MLA te chuan Pathian Khuanu rawngbawltu an ni tih an inhre vek taw hang a, Pathian thu dodal zawnga rorel palh an hlauh hliah hliah tawh dawn avangin rorelna zahawm, hnam nu leh pa nih tlingin ro an rel tawh zawk ang. 
8.      Zoram tharah chuan  Zoram-a zirna sikul zawng zawnga thawktu zirtirtute chuan zirlai an enkawl meka an hna chu Pathian rawngbawlna  ani tih an hriatvek tawh dawn avangin an taimain an thawk tha em em tawh dawn a, hlawh en zawn zitirtu ni loin Pathian rawngbawltu nih inhria zirtirtu an ni taw hang. Sikul chhia kan tih hi a bo ang. 

9.      Zoram tharah chuan kut hnathawktu zawng zawng leh sumdawngte pawhin Pathian ram chhunga thawk an ni tih an inhriat vek tawh dawn avangin Pathian thu ang loa hnathawh an duh ngai dawn tawhlo a; rinawmna leh dikna nena thawk vek an ni tawh dawn a ni. 

10.  Zoram tharah chuan mi tin an taimak vek tawh dawn avangin, kan hnathawh rah eisen loh kan thar taw hang a, hnam dangin kan hnam thawh chhuah an ei ve taw hang. 

11.  Hetih hunah chuan ram leilung hian a hausakna a pa chhuahtir ang a, ram  rethei nihna chu um boin a awm ang a, retheihna avanga lungngaihna chu kan hmelhriat ngai tawh lo ang. 

12.  Zoram tharah chuan mihring indona thawm ri leh inbeihna thawm ri a reh vek tawh ang a, mahni tanghma haina thawm ri a rehin intanpuina thawm riin Zoram chu a khat tlat tawh dawn a ni. 

13.  Zoram tharah chuan Pathian Khuanuin leilung a din tirha mihringte luah tura a din lai khan, keini Zo hnamte hi a din nghal hnam kan ni tih kan inhre vek tawh dawn a. Tu thlah nge kan nih tiin kan buai tawh dawn lo a, kan thlahte hi khawiah  nge an awm ttin kan mit kan len tawh zawk  dawn a ni. 

14.  Zoram tharah chuan Pathian Khuanu hian tisa nunna chauh ni lo, “Chhungnung Nunna(Chatuan Nunna)”min pet el nghal vek a ni tih kan hre vek tawh dawn a. Chatuan nun nei turin beih leh tih leh rin ngai a awm reng reng lo a, mihringa min siamtu khan kan tisa nunna leh kan thlarau lam nunna(chatuan nun) min pe kawp nghal a ni  tih kan hre vek taw hang. Tisa boral hnu pawha Chatuan Pa angchhunga kan awm tlang nghalna tur nunna chu kan nei vek a ni tih hriain Zoram thar chu Pathian mi niin kan luah vek dawn a ni. 

15.  Zoram tharah chuan Kohhran pawl hrang hrang a awm tawh dawn lo a, mi tupawh Zohnam ni a a lo pian khan Zohnam Sahuaah a awm nghal a,a  va rin chawp emaw a pawm chawp emaw a ngai lo. 

Mihringa  lo pian khan a sakhuan chu a pianpui tel nghal thlap a, a  sakhuaah chuan a ram leh a hnam a bet tel nghal vek a, ram leh hnam leh sakhua chu pumkhat a ni avangin, sakhua pakhat ram pakhat, hnam pawh pakhat kan nihah kan chiang vek tawh dawn a ni. Ram dangah kan sakhua a awm lo a ni tih kan hre vek taw hang. 

16.  Zoram tharah chuan kan ram leh hnam, kan khua leh tui, boruak thlfim, kan luipui, thing leh mau, kan thlai thar te leh kan thil neih engkim hian Pathian Khuanu chu kan fak tawh ang. 
17.  Zoram tharah chuan hmeichhe hrin reng reng Pathianah kan be tawh ngai lo ang. Ni leh thla leh arsite leh tuifinriat zau tak leh kan chenna  khawmualte mai bakah thilnung tinreng leh mihringte min siamtu ka Pathian Khuanu chauh hi kan be taw hang. Amah chu kan Pathian Khuanu a ni kumkhua tawh ang. 

18.  Zoram tharah chuan kan Pathan thu chu kan ram, kan hnam leh kan Pathian Khuanu nena kan inkawp tlatna thu hi a ni taw hang. 

19.  Zoram tharah chuan kan Zohnam nunzia(culture) hi Siamtu khuanu min pek, kan hnam Pathian thu chu a ni tih kan hre vek tawh dawn a ni.

Hengte hi kan hnam nunphung (culture) min pek chu a ni:

·         Tlawmngaihna.

·         Thian chhan thih ngam nun.

·         Mahni thil neih ei bil duh lo, sem sem dam dam; ei bil thihna tih nunpuitu.

·         Mite tanpui nih aia mite tanpuitu nih tum tlat hnam.Rethei hle chung pawha tanpui ngai nih hlau hliah hliah.

·         Zonun ze mawi, “Kei ka thawk ang; nang lo awl rawh,”tih a taka nunpui tlat thin.

·         “Thenawm te do ai chuan khaw sarih do a thlanawm zawk”tih chang  vawng nunga, thenawmte do duh ngai lo hnam.

·         Mai leng um ngai lo, duham ngai lo.

·         Khua leh tui, ram leh hnam chhan nana nun hlan ngam, thingserh sat thin.

·         Zohnam thuam leh hnam lam chi hrang hrang nei.

·         Aia upate zah thiam.

·         Nu leh pa hnial ngai lo, nu leh pate thu a kawi a ngila zawm tlat thin.

·         Ruk ruk leh dawt sawi duh ngailo.

Zoram tharah chuan heng kan hnam nun mawi leh ropui takte hi a par chhuak leh ngei ang.

ZORAM THAR CHU ENGTIA CHUAN KAI TUR NGE?

Zoram thar chuang kai tur chuan Zo hnam thuam famkima kan inthuam chauhin a chuankai theih a ni. Hnam dang thuam inbel chung leh ram leh hnam then darha awm chungin Zoram thar thlen theih a ni lo a, thlen dan pawh a awm hek lo.

Kan ram leh hnam then darha awm hi kan inzawm khawm hma loh chuan Zoram thar thlen theih a ni lo.  KAn inzawm khawm leh theihna turin ralthuam, silai leh tha chakna hmanga sual chhuah chi a ni lo. Kan hnam kan dikna chanvo dik tak hmangin khawvel hriatah hlankai tur a ni.

Khawvel rorelna sang ber UNO-ah khuan ram independent ni si lo, hnam awm vete huang an siam a, chu huanga tel (member) ni tur chuan heng thil pali(4) hi a ngai:

1.      Hnam a n nei tur a ni.

2.      Ram chenna bial bik an nei tur a ni.

3.      Khawvel map-ah fel taka rin kual theih a ni tur a ni.

4.      Tobul hran an nei tur a ni.

Heng zawng zawng hi ZoRO chuan a chhang fel vek tawh a. Chuvangin, kum 1999 khan UNO-in Indegenous People Organization (IPO) a tithe zingah Zohnam chu kan tel ve ta a. UNO-ah chuan member niin kum tin palai intirh a ni ve ta a ni. UNO chuan kum 2007 September ni 13 khan United Nations Declaration on the Rights of Indigenous a pawm a. Chuta Zohnamte kan dikna rawn lang ta nghal chu- “Article 4-naah tualchhuak hnam (indigenous nation)- te chuan mahnia ro inrelna chungchangah anmahni huang chhungah thuneihna pumhlum nei tura dikna chanvo an nei a, sum mamawh tur lakluh leh hman thlengin thu tawp an nei a ni,”tih a ni.

“Article 26-naah tualchhuak hnamte chuan an ram luah lai leh a leilung hausakna an luah hlen sa leh an ta sate chungah chuan neitu nihna an nei a ni,”tih a ni.

Article 3-naah, “Tualchhuak hnamte chuan duh thlanna kawngah zalenna an neia, chu zalenna hmang chuan ram inrelbawlna leh ei leh bar, khawtlang leh nunzia chawi vawnna kawngah an dh dan ang a hma lak theihna an nei a ni,”tih a ni bawk.

Heng Article pathum chauh kan han tarlan atang pawh hian Zoram thar kan chuan kai maina tur chu UNO-ah chuan a inhung fel thlap tawh a. Zo hnahthlak zawng zawng kan lungrual a, kan thlan fel mai theih kan ban phak rengah kan duh hun huna kan lawh mai turin a hmin fel thlan tawh a ni.

Zoram thar chuangkai tur chuan hnama kan hnukpui ber sakhaw thuah hnam dang sakhua kan sin tlat chhung chuan Zoram thar chu kan chuangkai thei hauh lo ang. Tuna Zofaten kan sakhua emaw kan tih Kristian sakhua hi hun la rei lote 1894 atang chauha English ho min rawn hrilh chawp, kan lo pawm chawpa kan lo rin chawp a ni. Sakhaw tak chu pawm chawp leh rin chawp chi a ni lo a; hnam kan lo pian chhuah khan kan pianpui nghal a ni. Rin a ngai lo a, pawm angai hek lo. Zo hnam min siamtu hian hnam tinte a saiam a, an awmna tur te, an hnam nunphung turleh an chenna hmun(ram) a buatsaih vek a. Keini pawh Pathianin hnamah min siam a, chenna tur ram min pe a, Amah chu kan Pathian Khuanu a ni a, Kristiana luh kawi angai lo. Min siamtu  min siam ang leh min dahnaa kan awm mai hi sakhua a ni a, heath hian sakhua a kim nghal a ni. Pathian thilsiam zawng zawng hian sakhua an nei vek a ni.

Heti ang hia nih avangin ram, hnam leh sakhua hi then hran theih reng reng loh pumkhat  a ni. He thu hi Zofaten kan hriat fel hunah chuan Zofate tan kan ram Zoram leh Zohnam hi Pathian thu kan ni tih kan hre fel taw hang. Tichuan, Zofate nunah Zoram thar chu hmel felt akin o lo lang ang a, a hma lama kan tarlan takte kha a lo par chhuak taw hang.

Tuna Kristianna hnuai atang hi chuan Zofate rilru zawng zawng Zoram atangin Israel ramah a pem lut vek a. Israel ram chanchin sawi chu Pathian thu sawi an ni tawp mai a, Zoram chanchin sawi chu khawvel thil sawi niah an indah vek a. Chuvangin, Zohnamte hi Zoram chhungah an rinawm thiam lo a, an dik thiam bawk hek lo. Zoram leh Zohnam tana rinawm emaw an rinawm loh emaw pawhin Pathian pawi khawihah an inngai lo hrim hrim.

Chuvangin, Juda-mi Isua, Mari fapa faka lam vak vak te, mi tin thinlunga lantira amah chawimawi a au vak vak leh a chanchin sawi darh chiam chiam chu Kristian Pathian thu a ni mai a, Zoram leh zohnam  Pathianin min enkawlna leh min kaihhruaina tel hauh loin Zoram thar a lo thleng thei lo a ni.

Sakhua chu pianpui nghal a ni a, siam chawp leh hmuh chawpah a awm lo. Thilnung zawng zawng hian sakhua an nei vek a, anmahni siamtu kha an sakhua a nia, a siamtu siam ang a an awm mai kha an sakhuana chu a ni.

Zoram hi Zofate tan Pathian thu a ni tih hliah tlattu chu Bible hi a ni. Sakhaw thuah chuan hnam lungrualna phet darh vek a, Zofate pawl hrang tamtaka min then darhtu chu Bible hi a ni. Kan hnam nunzia (culture) zawng zawng Pathian thu ni loa min ngaih tirtu chu Bile hi a ni. Engkim siamtu be mai loa mihring  Isua Pathiana min biak tirtu chu Bible hi a ni. Bible hi Zofaten eng laiah nge kan thatpui? Israel ram, ram thianghlima min ngaihtirna te, Israel Pathian hnam thlan nia min ngaihtirna te, Israel khua leh lui luang zawng zawngte Pathian thua min ngaihtirna te, Mari fapa Isua kha khawvel chhandamtuemaw min tihtirna te hi Zofate tan Bible kan thatpuina em ni ta mai?

Khuanu Pathian hian khawvel hnamtin te hi a duh taka a siamte kan ni vek a. Duh mang loa a saim hnam an awm reng reng lo. Duh taka a siam mihring te tlakna meidil hi a siam reng reng lo. Mihring pawhin kan tih duh hauh lo tur mahni fate thu awih lo deuh hremna chatuana an tlakna tur ‘Meidil’tu nu leh pa mah hian an siam dawn lo. Mihring aia rilru chhe zawk daiha min siamtu Pathian puhna hi dawt hlawm tawp a ni.

Pathian chuan a mihring siamte reng reng hi tisa nunna leh thlarau (chhungnung) nunna(chatuan nunn) min pe kawp nghal vek a, chu chu Pathian chatuan remruat a ni. Tisaa sualna reng reng chu tisaa tuarnaa seng vek a ni a; tisaa thatna pawh tisaa vanneihnaa dawn vek a ni mai zawk a ni.Tisa tan khawvel bakah hremhmun a awm lo a, tisa tan khawvel baka vanneihna a awm bawk hek  lo. Tisa nunna hi chu khawvel nunna nena inkawp tlat a ni a, khawvela hman atan chauh a ni. Pialralah ken tlang theih a ni lo.

Chhungnung nunna(thlarau nun) chu Pathian nunna nen inzawm tlat, tisa damlai leh tisa thih hnu pawh a siamtu Pathian nena inkawp tlat, Pathian nihna famkima thuam, chatuan minung kan nihna chu a ni. Chuvangin, kan thlarau nunna hi chu tisa nunna nen sawi kawp chi a ni lo. Pathian atanga chhuak Pathian nunna kan chan chu a ni a, chu chu Zofaten kan hriatfel chuan Zoram hi Pathian thuin kan luah fel thiam ang a, Zoram thar kan chuangkai taw hang.

Nunna(chatuan nunna) thuah chuan khawvel pian tirh atanga mihring lo awm tawh zawng zawng kum maktaduaih tela thi tawh zawng zawng leh tuna dam lai mek leh lo la piang zel tur zawng zawng pawhin siamtu Khuanu nunna kan chan theuh bak chu nunna dang reng reng a awm chuang lo a ni. Pathian thatna hi khawvel mihring zawng zawngin angkhat veka kan dawn a ni. Duhsak bik hnam a neireng reng lo. Amah hriat fiahna lama thangharh hnam apiang hnam vannei an ni.

I ram I hmangaih loh a, I hnam I hmangaih loh chuan Pathian I hmangaih miah lo tihna a ni a; I ram I hmangaih a, I hnam I hmangaih bawk chuan Pathian Khuanu chu I hmangaih tihna a ni. Mi tumahin an hmangaihte an bum ngai lo a, an thil neih an ruk sak ngai lo a; dawt an hrilh ngai bawk hek lo. An hmangaihte thatna tur an ngaihtuah ngat ngat a, a tana tuarna turah pawh a hmangaih tan chuan tuar a huam em em zawk thin.