LALRAMA MIHRINGTE PATHIAN KAN NIHNA

Pathian chu Pathian a lo nihna hmunah, a nihna ze kim tarlanna te, mihring chu a hringchan tisa leiah lêng mah sela, Nunna Lalram chhunga a nihna tak i lo sawi dawn teh ang.

Kan tisa mihring chu he leia a len vel lai reng hian kan hringnun hriatnaah Lal thu hriattirna a lo thleng a. Chuta Lal inpuannaah chuan, Nunna Lalram chhunga chatuan taksa famkima kan dinnaah chuan mihring ni tawhloin Pathian kan ni tih kan lo hre ta a. Chu chu,”Mihring nihna hlip thlaa Pathianah min siam ta,” angin a rawn sawi a, hei hi tawngkam dang a hman avangin ngaih thiamloh tur leh hriat thiam loh tur a awm lo a ni. Tichuan, Pathian nih thu chu he thuhriltu hian a han puangchhuak ta a ni.
Lal mi nihna taka dingte chu chatuan taksa leilunga kan dinnaah chuan mihring ni loin, Pathian kan ni vek a ni. Chu thu chu Lal chuan kan hringnun hriatnaah a rawn puang ta a. Chu thu chu a han hriat phat chuan Lal chu a fak ta nghal a ni.

“Pathiante dinnaah chuan Pathian chu Lalah a thu e,

Mihringin Lalram a luah thei si lo.”

“Pathian,” a han tih hian, mihringte chu kan sawi tàk ang khan Lalram chhûngah chuan Pathian kan ni a, chu kan nihna tak chuan, “Pathiante,” tia lam a ni. Chu Pathiante zingah chuan Pathian chu Lalah a thu a. Hei hi a dik hle mai. Kan nihna niin kan hre ve hlawm em aw? “Pathiante,” tia vuah kan nih hi.

Hmanlai kan pi leh pute chuan mihring awm khawmna chu, ‘Khua’ an loti thin a nih kha. Thenzawl khuaa awmte chu, Thenzawl khua an ni a, “Thenzawl Pathian,” an ni. Khua chu ‘Khua’ a lo nih theihna chhan chu, ui emaw vawk emaw a awm vang a ni lo a; thing leh lung te a awm vang emawa ni hek lo. Tui a awm avanga Pathian a ni lo. Khua chu mihringte an awm avanga ‘Khua’ ni chauh a ni zawk e. Laltlanzova chu Thenzawl khua niin; Aizawlah a lo zina. “Laltlanzova hi Thenzawl khua a nih hi,”kan tih chuan, ” Laltlanzova chu Thenzawl Pathian a ni,” tihna a ni. Chuti ang bawk chuan Lalenkawla pawh Darlawn Pathian tihna a nih chu!! A hringchan tisa kha Pathian a ni e, ka ti lo a; Nunna Lalrama a hming tak zawkin ka lam/sawi a nih chu.

Kan pi leh pute chu an awmna khua apiangah an Pathian KHUA chuan a chenchilh a, an Pathian tãnchuan anni chu a khua leh tuite an nih tlat avangin an Pathian khua chuan a chhinchhiah tlat a; chu chu, “Khuavang chhinchhiah,” an tih chu a ni. Tunlai thalai hoin, hmaileh taksa peng dang vuna thil dum awm chu,”Khuavang,” an ti thin a, ani lo. Khuavang chu Pathian a nih avangin a hmuh theih loh a, “Khuavang chhinchhiah,” ani zawk e.

Kristiante chuan an Pathian chu Isua a ni a, an lam zing deuh ber a ni. Mahse mihring a ni a, he mihring Isua hi Pathian ni leh thin, mihring ni leh thin anga an inzirtir hi a dik lo. PATHIAN chu mihringah a cheng ngai lo a, mihring pawh Pathianah a cheng ngai hek lo. Mihring thlah chu mihring niin Pathian thlah chu Pathian a ni. Mihring chuan Pathian anna pawh a nei lo a, Nunna Lalramahchiah chuan Pathian kan ang thei a ni. Amaherawhchu, chutah chuan Pathian kan ang a ni mai tawh lo a, a nihna tak zawkah chuan Pathiantak kan ni zawk. Pathian kan an chuan, Pathian kan la ni lo tihna a ni.