NUNGA AWMA CHU KA NI E

Lalpa, i hnen atangin he thil mak hi ka hmu chhuak ta, Nangma lama ka nihnaah khan, pian tirh ata sualna ka nei si lo. Tlan ka ngai lo a, thawh leh ka ngai bawk hek lo."

Kan unau Kristiante chuan mihring zawng zawng hi Adama avanga sual faa piang vek niin an ruat a, chuvang chuan Isua ringlo tu chuan chatuan nunna chu thlarau khawvela an thlen hunah an chang dawn lo niin an ngai a ni. Keini (Nunna Lalhnam nia dingte) chuan piantirh ata sualna kan neilo a, sual sain kan lo piang bawk hek lo. A nihna takah chuan, eng hnam mah hi mihring an nih chuan sual sain an piang lo reng reng a ni.


Kristian-te chuan sual saa lo piang niin an inhria a, Isua a rawn thih a, a thisena tlan an ngai niin an inhria a. Isua thisenin a tlan lo chuan hremhmunah Pathianin chatuana na tuar turin a dah dawn niin an ring bawk. Tichuan, an thih hnuah Isua ringtute chu thiam changin an tisa leia lo ral tawh chu a tho leh ang a, vanramah a cheng tawh ang a; Isua ring lotu chu thiamloh changin a tisa chu a tho leh ang a, chatuanin hrem a tuar ang, tih chu an rin dan a ni.

Keini erawh chu piantir ata sual saa piang kan awm lo a, tumahin min tlan kan ngai hek lo a ni. Mi sual hrem tlak chu rorelna hmaah, man an nih chuan an ding thin. An mahni sawisaktu tur ukil an ruai ▶hin a, ukilin a sual man hlawh tur chu hrem loh tura a sawi fel sak theih chuan hrem a ni lo ang. Keini erawh chu sualna nei lo Lal fa kan nih avangin thisena tlan kan ngai lo ani tih kan hnena inpuang thin Pathian chuan min hriattir a ni.

Khawvela mihring lo piang chhuak reng reng hi tho leh turin tumah Pathianin a siam loh avangin an thih hnuah tumah an tho leh hek lo ang. Tumah tho leh an awm hek lo. Thlarau tho leh tur pawh kan nei lo. Mihring hian thlarau a nei lo, Pa hnenah thlarau, tia sawi tur chuan kan Pathianna thlarau tak chu chatuanin a ding tawh zawk a ni.

Nunna Lalram chhungah chuan chatuan nunna taksa neiin kan ding reng tawh a, chu chu keimahni tak zawk a chu a awmna hmun chu a ni. Chutah ngei chuan chatuana mi nung kan lo ni tawh . Chuatah chuan, 'Nunga' ka ni a, 'Awma' ka ni e.

"Leilung leh hunbi hian min khuh phak lo a, ka chanchin chhiar thiam khawvelah an awm si lo"
Khawvel chim phak lohah kan nunna tak chu a awm tawh avangin, he khawvela hun inher danglam hian kan awmnaah thu a nei phalo. Ni leh a vela inher thinte avang hian hun chhiarna chu, "Ni khat, ni hnih, kum khat, kum hnih," tiin kan hringnun tisa hian a chhiar thin a; chung ang thil chuan nunna ramah chuan awmzia a nei lo a ni. Heti ang thu te avang hian he kan chenna leilung mite hian hriatthiam har a ti thin a; an chan ram a nih ve loh avangin.